काठमाडौं । सुप्रसिद्ध पर्यटन व्यवसायी अम्बिका श्रेष्ठको निधन भएको छ ।

नेपालको प्रसिद्ध द्वारिकाज होटेलका सञ्चालक रहनुभएकी उहाँको बिहीबार बिहान मेडिसिटी अस्पतालमा निधन भएको हो ।

श्रेष्ठ नेपालको पर्यटन, मिडिया र सांस्कृतिक सम्पदा संरक्षण लगायतका क्षेत्रमा सक्रिय हुनुहुन्थ्यो । नेपालस्थित स्पेनको महावाणिज्य दूतावासको प्रमुखको रुपमा ररहनुभएकी उहाँको विवाह द्वारिका प्रसाद श्रेष्ठसँग भएको थियो ।

पतिको सन् १९९१ मा निधन भएपछि उहाँले पूर्ण रूपमा द्वारिकाज होटेलको जिम्मेवारी सम्हाल्दै आउनुभएको थियो ।

उहाँले महामहिम राजा जुआन कार्लोस प्रथम (स्पेन)बाट क्रस अफ द अर्डर अफ सिभिल मेरिटको अलंकार प्राप्त गर्नुभएको छ ।

उहाँका दुई छोरीहरु हुनुहुन्छ ।