काठमाडौँ । नेकपा एमालेले प्रधानमन्त्री पुष्पकमल दाहाल प्रचण्डलाई दीर्घकालीन असर पर्ने गरि काम नगर्न र नगराउन ध्यानाकर्षण गराएको छ ।

बिहीबार एमाले महासचिव शंकर पोखरेलले विज्ञप्ति जारी गर्दै संसद्का दुई ठुला दल एमाले र नेपाली कांग्रेसबिच राष्ट्रिय सहमतिको सरकार गठन गर्ने समझदारी भएको र एमाले अहिलेको सरकारबाट फिर्ता भएको स्मरण गराउँदै त्यस्ता निर्णय नगर्न भनेको हो ।

अहिलेको अवस्थामा प्रधानमन्त्री प्रचण्डले विश्वासको मत समेत पाउने अवस्था नरहेको जनाउदै एमालेले सरकार गठन प्रक्रियामा सहभागी हुन र सहयोग गर्न अनुरोध गरेको छ । ‘एमालेले सरकारलाई दिएको समर्थन फिर्ता लिनुका साथै पार्टीबाट सरकारमा प्रतिनिधित्व गर्ने मन्त्रीहरूले राजीनामा समेत दिइसकेको अवस्थामा सरकार स्पष्ट अल्पमतमा परेको अवस्था छ’, जारी गरेको विज्ञप्तिमा भनिएको छ ।