![](https://www.mountainkhabar.com/wp-content/uploads/2024/06/449096839_877004474454294_8384397332405378757_n-1-1536x864-1.jpg)
विराटनगर । मुसलधारे वर्षासँगै खोलामा आएको बाढी बस्तिमा बस्दा विराटनगरमा ५०० बढी घर डुबानमा परेको छ ।
विराटनगरको पूर्वतर्फ संघीया र पश्चिमतर्फ केसलीया रहेका खोलाको बाढी तटीय बस्तीमा पस्दा वडा नम्बर ६ का ५ सय घर डुबानमा परेको वडाध्यक्ष हरिशचन्द्र सहनीले जानकारी दिए ।
यस्तै, केसलिया खोलाको बाढी पनि वडा नम्बर १२ को बस्तीमा पसेको मोरङ प्रहरी प्रवक्ता डिएसपी ज्ञानेन्द्रबहादुर बस्नेत जानकारी दिए ।केसलिया खोलाले ६० बढी घर डुबानमा परेका छन् । विराटनगरका वडा नम्बर ४, ६ र ११ नम्बर वडाका बस्ती डुबानमा परेका छन् ।
मंगलबार रातिदेखि परेको पानी नरोकिएपछि विराटनगरका विद्यालय पनि बिदा भएको छ । वर्षाका कारण विराटनगरका अधिकांश क्षेत्र डुबानमा परेपछि बाढी प्रभावितलाई राख्नका लागि विद्यालय र सामुदायिक भवनलाई तयारी अवस्थामा राखिएको विराटनगर महानगरका प्रवक्ता तथा विराटनगर–५ का वडाध्यक्ष सन्तोष न्यौपानेले जानकारी दिए ।
भारी बर्षासँगै पानीको बहाव बढेपछि सतर्कता अपनाउन स्थानीय प्रशासनले आग्रह गरेको छ ।